طريقة عمل مورد الخدود والشفايف
هنقولك طريقتين سهلين لعمل مورد الخدود والشفايف للون وردي طبيعي.
الطريقة الاولى:
المكونات:
كريم مرطب.
بودرة دم الغزال “من عند العطار”.
الطريقة:
هاتي اي علبة صغيرة فاضية عندك حطي فيها كمية كريم مرطب زي ما انتي عايزة وتقدري تستخدمي اي نوع كريم مرطب عندك, بعد كده ضيفي بودرة دم الغزال كمية بسيطة جدا على طرف المعلقة وقلبيهم مع بعض وجربي اللون على ايدك لو لقيتي محتاجة تزودي اللون شوية زودي كمية دوم الغزال بالتدريج لحد ما توصلي لدرجة اللون اللي انتي عايزاها, وكده يبقى المورد جاهز عندك تستخدميه على الخدود والشفايف للون وردي طبيعي.
الطريقة التانية:
المكونات:
معلقة كبيرة مية سخنة.
معلقة صغيرة فازلين.
معلقة صغيرة جليسرين.
معلقة صغيرة نشا.
نقطتين لون طعام احمر.
نقطة زيت عطري “اي نوع تختاريه” وده اختياري.
الطريقة:
في برطمان صغير او علبة صغيرة حطي المية السخنة, وضيفي عليها الفازلين وقلبيهم كويس لحد ما تدوبي الفازلين, بعدها ضيفي الجليسرين والنشا ولون الطعام والزيت العطري, وقلبي كل المكونات مع بعض كويس جدا لحد ما تمتزج كلها, حطي الخليط في الفريزر لحد ما يتماسك كويس, وبعدين تطلعيه وكده يبقى المورد جاهز للاستخدام اي وقت تستخدمي منه ورجعيه احفظيه في التلاجة.
وممكن طريقة تانية ابسط انك تخلطي بس الفازلين بدم الغزال, وكده يبقى مورد طبيعي بمكونات بسيطة.
